Ya semos de raso en ibierno. Collarada ye plena de nieu. Á las precipitazions de nieu las clamamos en aragonés nebatas u nebazos. Si son grans y os flocos cayen berticals charramos de nebascos u nebazizos. Si as nebatas son chicotas las clamamos nebuscardas u nebadotas.
Seguntes Chusé Inazio Nabarro en o suyo libro "Reloch de Pocha" bi`n ha muitas clases de nieu.
NIEU FRESCA. Ye a nieu que plega de cayer.
NIEU BIELLA. Ye a nieu que no ye pas rezién.
NIEU BLANCA. Ye a nieu impoluta, sin tacas.
NIEU MORENA. Ye a nieu que ye plena de tacas de tierra.
NIEU ZANZERA. Ye a nieu que garra chen no ha pisato encara.
NIEU ATAPITA. Ye a nieu bien dura.
NIEU CHELATA. Ye a nieu cuan se fa chelo.
NIEU GRASA. Ye a nieu que se fa augua.
NIEU TOBA. Ye a nieu blanda.
NIEU DE BONANZA. Ye a nieu que se desfá fazilmén.
NIEU CHAPALETA. Ye a nieu que se funde y se fa augua.
NIEU CHOMPA.Ye a nieu cuan se regala. A metat ye augua y l´atra metat ye nieu.
NIEU POLBINA. Ye a nieu menuta que se fica per toz os cabos.
NIEU RABIURA. Ye a nieu muito menuta que i caye cuan a temperatura ye prou baxa.
NIEU FARINOSA. Ye a nieu menuta que aparex mezclata con cualque cosa d´aire. Tien una testura parellana á la de a farina y se desfá con as mans.
NIEU ZINARRA. Ye a nieu menuta y muito fina.
NIEU MATACRAPITOS. Ye una nieu mezcliza entre una nebata e una pedregata. Puede estar nieu fina e chelata, y tamién auguanieu en forma de piedra.
NIEU ZOCAL. Ye a nieu que s´apega á os piez cuan ha nebato muito.
AUGUANIEU. Ye a nieu que ye meyo nieu y meyo augua.
